Location: Archivio di Stato, Siena
Sub-Location: Diplom, Sant’Agostino di Siena sub datum.
Type:Personal Letter
Language:Latin
Transcription Author: Tom Henry
Transcription Date: 2011-01-12
Published: yes
Publication Details: Published by M. Seidel, ‘Die Fresken des Francesco di Giorgio in S. Agostino in Siena’, Mitteilungen des Kunsthistorischen Institutes in Florenz, XXIII (1979), pp. 3-108, p. 99 note 55.

Last modified 2011-01-10 18:39:01.663531+00:00

Bichi chapel in Sant’Agostino, Siena mentioned in a letter from Cardinal Todeschini-Piccolimini

Dates: 1.11.1494
Picolhomineus Sancte Romane Ecclesie Sancti Eustachii Diaconus Cardinalis senensis, per universam Italiam apostolice Sedis Legatus universis Christifidelibus presentes nostras inspecturis salutem in Domino semperiternam. Splendor paterne glorie qui sua mundum illuminat inefabili claritate, pia vota fidelium ac clementissima ipsius maiestate sperantium tunc precipue benigno favore prosequitur cum devota ipsorum humilitas Sanctorum meritis et precibus adiuvator. Et quoniam inter Sanctos et electos Dei gloriosus Christi martir eximius Sanctus Cristoforus cuius humera Redemptorem nostrum Christum Yhesum portare eciam meruerunt, vellud stella radiat matutina, dignum quim pocius debitum reputamus ut ecclesias in quibus tam preclari martiris memoria veneratur, quantum cum Deo possumus spetialis favoris dono et honoris gratia prosequamur. Cupientes igitur ut ecclesia Sancti Augustini de Senis, in qua est venerabilis Capella Sancti Cristofori quam nobilis domina Eustochia de Bichis magna impensa, specioso opere et singularibus ornamentis fieri procuravit, congruis frequentetur honoribus et Christifideles eo libentius devotionis causa confluant, ad eandem quo ibidem dono celestis gratie conspexerint se refectos, auctoritate apostolica specialiter nobis in hac parte concessa de omnipotentis Dei misericordia et beatorum Petri et Pauli apostolorum, eius precibus et auctoritate confisi ac magnifici et generosi militis domini Antonii de Bichis, patris prefate domine Eustochie, precibus inclinati, omnibus et singulis Christifidelibus utriusque sexus vere penitentibus et confessis, qui in festo Sancti Cristofori a primis vesperis usque ad secundas, et in die Veneris Sancte VI Parasceve dictam ecclesiam et Capellam devotionis causa visitaverint et pro illius fabrica et ornamentis manus porrexerint adiutrices singulis annis quotiens id fecerit, decem annos et totidem quadragenas de iniunctis sibi penitentiis in Domino misericorditer relaxamus presentibus perpetuis futuris temporibus duraturis. In quorum omnium et singulorum fidem et testimonium premissorum presentes litteras fieri et per secretarium nostrum infrascriptum subscribi nostrique pontificalis sigilli iussimus et fecimus appensione communiri. Datum Senis, in domibus nostris, sub anno ab Nativitate Domini millesimo quadringentesimo nonagesimoquatuor indictione duodecima die vero prima novembris pontificatus sanctissimi in Christo patris et domini nostri, domini Alexandri pape sexti anno tertio. A. de Alberiis