Type:Other text
Language:Latin
Transcription Author: Tom Henry
Transcription Date: 2011-01-12
Published: yes
Publication Details: Published by M. Seidel, ‘Die Fresken des Francesco di Giorgio in S. Agostino in Siena’, Mitteilungen des Kunsthistorischen Institutes in Florenz, XXIII (1979), pp. 3-108, pp. 98-9 n. 53.

Last modified 2011-01-12 10:22:25.818380+00:00

• Transcription

ALEXANDER Episcopus Servus Servorum Dei Universis Christifidelibus presentes litteras inspecturis salutem et apostolicam benedictionem. Ecclesias et loca ecclesiastica pia devotione frequentare et ad eorum conservationem et manutentionem manus adiutrices porrigere pium et meritorium apud Deum existimantes, fideles singulos ad hec et alia caritatis opera exercenda spiritualis muneribus, indulgentiis videlicet et remissionibus, frequenter invitamus ut per temporalia que illis exhibuerint auxilia premia consequi mereantur felicitatis eterne. Cum itaque, sicut accepimus, dilecta in Christo filia nobilis mulier Eustochia de Bichis, vidua, dilecti filii nobilis viri Antonii Iohannis etiam de Bichis, equitis senensis, nata, singulari devotione ducta, cupiens temporalia in spiritualia et transitoria in eterna felici comertio convitare, pro sue ac quondam Cristoferi de Bellantibus equitis senensis, olim eius mariti, nec non progenitorum et successorum suorum ac aliorum fidelium animarum salute, quandam Capellam sub invocatione Sancti Cristoferi in ecclesia domus Sancti Augustini Senensi, ordinis fratrum Heremitarum eiusdem Sancti Augustini, suis propriis sumptibus et expensis digno et laudabili opere a fundamentis construi et edificari facere ceperit, quam infra paucos menses absolvi posse sperat ipsamque capellam paramentis et ornamentis ecclesiasticis ad divinum cultum necessariis muniverit et ornaverit ac pro Christifidelium animarum salute suum opere desideret, dictam capellam etiam spiritualibus muneribus decorari. Nos cupientes ut dicta Capella a Christifidelibus frequentetur et in debita veneratione habeatur ac in suis structuris, edificiis et ornamentis conservetur et manuteneatur fidelesque ipsi eo libentius devotionis causa ad eandem capellam confluant ac ad conservationem et manutentionem predictas manus promptius porrigant adiutrices quo [lacuna] ibidem dono celestis gratie uberius conspexerint se refectos, de Omnipotentis dei misericordia ac beatorum Petri et Pauli apostolorum, eius auctoritate confisi, omnibus et singulis fidelibus ipsis vere penitentibus et confessis, qui capellam predictam in festo eiusdem Sancti Cristofori a primis vesperis usque ad secundas vesperas eiusdem festi inclusive, devote visitaverint et ad conservationem et manutentionem predictas manus porrexerint adiutrices, ut prefertur, decem annos et totidem quadragenas de iniunctis eis penitentiis misericorditer in Domino relaxamus, presentibus perpetuo valituris. Volumus autem quod si dictam Capellam visitantibus et ad premissa manus adiutrices porrigentibus seu inibi pias elemosinas erogantibus seu alias aliqua alia indulgentia in perpetuum vel ad certum tempus nondum elapsum duratura per nos concessa fuerit presentes littere, nullius sint roboris vel momenti. Datum Rome apud Sanctum Petrum, anno Incarnationis dominice millesimo quadringentesimo nonagesimo tertio, quintodecimo Kalendas aprilis, pontificatus nostri anno secundo.